Félagsbústaðir og E. Sigurðsson ehf. semja um nýbyggingu við Brekknaás

Nýtt sérhæft íbúðarhúsnæði fyrir fatlað fólk í Árbæ

Félagsbústaðir og E. Sigurðsson ehf. hafa gert með sér samning um byggingu sérhæfðs íbúðarhúsnæðis fyrir fatlað fólk við Brekknaás í Árbæ.

Samningurinn kemur í kjölfar útboðs á verkinu og er verkefnið hluti af uppbyggingaráætlun Reykjavíkurborgar um húsnæði fyrir fatlað fólk.

Sex íbúðir og þjónustuaðstaða

Í húsinu verða sex íbúðir auk aðstöðu fyrir þjónustu og daglegan stuðning við íbúana. Við hönnun og uppbyggingu verkefnisins er lögð sérstök áhersla á að skapa aðgengilegt, öruggt og vandað húsnæði sem mætir þörfum framtíðaríbúa.

Áætlað er að framkvæmdir hefjist í byrjun ágúst og að verkefninu ljúki í október 2024.

Hjá E. Sigurðsson ehf. erum við stolt af því að taka þátt í verkefni sem hefur mikilvægt samfélagslegt hlutverk og mun skapa betri aðstöðu og aukin lífsgæði fyrir framtíðaríbúa. Við hlökkum til áframhaldandi samstarfs við Félagsbústaði og aðra aðila sem koma að framkvæmdinni.